Parole nove

Ernesto Calzavara

«Dormono tutte le cause chiuse nei loro chiusi
e le teste mozze degli Archetipi a terra stanno»
Cusì ze sta dito in alto da quei che sa.
E noàltri cosa faremo?
Noàltri che no savémo lèzar né scrìvar
cosa diremo?
Balbetarémo nòve parole?
Chi ne darà in nòvi segni?
A B C D E …
come li metarémo insieme de no’vo?
No vegnarà nesùn a salvàrne de fòra via.
Ne tocarà a noàltri rangiàrse
rebaltàndose zo
rampegàndose su
de sto potzo dea vita.
Par vegnérghene fòra
da noàltri soli
par capir e capìrse.
«I fiori della solitudine»
quei che scrive i poeti
nesùn li agiutarà a sercàrli.
No i preti de le Ciéze
no i preti dei Studi
né quei del Governo
che oramài ze za a caza
ma i pòri cani
che se arabàta
noàltri li trovarémo.
E zveiarémo le Cause che dorme
par conto nostro e de tuti
e invidarémo le teste tagiàde
sui so còli driti
e ghe diremo a una a una
a una a una
PARLA