Si t’ ‘o ddico nun me cride
manco si pittass’ ‘o sole
pecché ‘o munno d’ ‘e pparole
mpara ll’arte d’ ‘o pparla’.
E tu saje ca st’arte è l’arte
ca se sceglie ‘o traditore
pecché l’ommo senza core
fa furtuna c’ ‘o pparla’.
Io, gnorsi’, pire so’ chillo
c’ha liggiuto e s’e’ applicato;
c’ ‘o mestiere s’ha ‘mparato,
e se serve d’ ‘o pparla’…
Se capisce ca parlanno,
nciucio, mbroglio… e faccio ‘ammore.
Ma però tengo nu core
e cu te, che vuò parla’!

Io chesto tengo:
tengo ‘o pparla’ nfaccia.
Pure si m’aggia fa’ nemico ‘Ddio
e me trovo cu isso
faccia a ffaccia,
nfaccia lle dico chello c’aggia di’.
Se scummoglia ‘o fenucchio?
E se scummoglia!
Cca’, pe’ tene’ cupierte st’altarine,
se so’ mbrugliate ‘e llengue
e nun se sa’pe
chi te fa bene
e chi male te fa.
Si nun se mett’ ‘o dito ncopp’ ‘apiaga
e se pulezza scafutann’ ‘a rinto
fino a che scorre ‘o sango
russo e vivo
cumm’ a chello ‘e Giesù
nostro Signore
‘a piaga puzza!
E siente nu fetore
ca t’abbelena ll’aria
‘a terra
‘o mare.
E nuie vulimmo ll’aria fresca e pura
celeste e mbarzamata
e chillu viento
ca vulanno
e passànno
a rras’ ‘e mare
se piglia ‘addore
e ‘a mena int’ ‘e balcune
pè dint’ ‘e stanze
e arriva ncopp’ ‘e lloggie
d’ ‘e case noste.

‘O rraù ca me piace a me
m’ ‘o faceva sulo mamma.
A che m’aggio spusato a te,
ne parlammo pè ne parlà.
Io nun songo difficultuso;
ma luvà mmel’ ‘a miezo st’uso.
Sì, ba vuono: cumme vuò tu.
Mò ce avéssem’ appiccecà?
Tu che dice? Chist’ ‘e rraù?
E io m’ ‘o mmagno pe’ m’ ‘o mangià…
M’ ‘a faje dicere na parola?…
Chesta è carne c’ ‘a pummarola.

Penziere mieje, levàteve sti panne,
stracciàtev’ ‘a cammisa, e ascite annuro.
Si nun tenite n’abito sicuro,
tanta vestite che n’avit’ ‘a fa?
Menàteve spugliate mmiez’ ‘a via,
e si facite folla, cammenate.
Si sentite strillà, nun ve fermate:
nu penziero spugliato ‘a folla fa.
Currite ncopp’ ‘a cimma ‘e na muntagna,
e quanno ‘e piede se sò cunzumate:
un’ànema e curaggio, e ve menate…
nzerrano ll’uocchie, primm’ ‘e ve menà!
Ca ve trovano annuro? Nun fa niente.
Ce sta sempe nu tizio canusciuto,
ca nun ‘o ddice… ca rimmane muto…
e ca ve veste, primm’ ‘e v’atterrà.

L’orario
e ‘a strada
pè truva’ pace
e cammena’ cuieto,
pe’ fa’ capi’ a te stesso
cumm’è ‘o penziero
ca tu tiene ncapa,
si sàpe ‘e sale
si ha pigliato ‘e fummo
si vale ‘a pena
invece
d’ ‘o penza’,
a Roma chesta strada ce sta sempe.
‘A truove sempe ‘a strada
‘a piazza
‘o vico:
se trova all’alba
‘e juorno
‘e notte, sempe.
Attuorno siente ‘a musica d’ ‘e vvoce,
pè ll’aria
‘a luce e ll’ombra d’ ‘e pparole:
parole grosse e chelli piccirelle.
Truove ‘e mountagne
‘o verde d’ ‘a campagna’
e ccase d’oro
ca se fanno rosse
po’ ‘e ramma,
cumm’attone
e doppo ‘argiento…
Te truove overamente ncopp’ ‘o munno
cuieto e sulo
e stienne ‘o passo nzieme c’ ‘o nzieme c’ ‘o penziero.

Per i problemi del meridione
c’è stato un certo riconoscimento
che da quando ci fu il risorgimento
con ansia s’aspettava ‘a decisione.
Finalmente e’ arrivata! Il milanese,
che esporta e importa e nun le mporta niente
si tu te muore ‘e famma e te lamiente,
si e’ commosso e ci ha detto: Questo mese
daremo al meridione la patente
di terzo grado come esportatore:
che volete esportare, buona gente?
E il meridione ha detto: ‘O core e’ core.
Quello che il settentrione ci consente:
nu poco di colera di strafore.

È tantillo
niro niro
e appuntuto,
tuosto comm’ a na preta:
nu vriccillo…
e cchiù nniro d’ ‘a pece.
Chisto è l’uosso ‘aulivo.
Quanno ha menato ‘ rradeche
int’ ‘e bbrecce,
cumm’ ‘o cecato còse e nfila l’ago,
e c’ ‘a stessa pacienzia
ha zucato ‘a muntagna
pè nu migliaro d’anne
e s’è stennuto
allargato
nquartato
e s’è turciuto
pè guardarse attuorno
cumme vulenno dicere: Guardate!
Tiempo ce n’è vuluto,
e che vuò dicere?
L’aggio fatta ‘a cacciata!
tre perzune l’abbracciano,
e na folla
nce s’arrepara sotto
si chiove
o coce ‘o sole. E p’ ‘e muntagne
cadeno ll’aulive
e ruciuleano.
‘O sole ‘e secca
e ‘a morte e ‘a vita,
nun aspetta! ‘E ppiglia a curtellate
e pè dint’ ‘e ferite
nce và mpezzanno
‘e rame già crisciute,
chille ca cu certezza
ncap’ a n’anno, tre, quatte
le fa scorrere ll’uoglio.
Tutt’ ‘o riesto d’ ‘a pianta
‘o ttaglia,
‘abbruccia.

Napule è ’nu paese curioso
è ’nu teatro antico, sempre apierto.
Ce nasce gente ca senza cuncierto
scenne p’ ’e strate e sape recità.
Nunn’è c’ ’o ffanno apposta; ma pe’ lloro
‘o panurama è ‘na scenografia,
‘o popolo è ’na bella cumpagnia,
l’elettricista è Dio ch’ ’e fa campà.
Ognuno fa na parte na macchietta
se sceglie o tip o n’omm a truccatura
L’intercalare, a camminatura
pe fa successo e pe se fa guarda.

Cielo
ca puntualmente
‘o mes’ ‘austo
abbremecato
‘e stelle
te presiente,
e ca te faie
cchiu’ blu’
pecche’
cchiu’ argiento
cchiu’ splendente
e brillante
sti meliune
‘e stelle
‘anna pare’…
cielo,
tu saie che ssi’
pe’ chistu munno,
pe’ nnuie ca t’aspettammo
e te vedimmo?
Si’ ‘o finale
ncantato
‘e nu cunto
ca nuie stesse ammentammo,
e sulitariamente
c’ ‘o core
e c’ ‘o penziero
nce cuntammo. cumme se specchia a mmare
dint’ ‘o cuntammo.
Cumme se specchia a mmare
dint’ ‘o scuro
‘o ffuoco d’ ‘e granate!
Se spara p’ ‘a custiera,
tuorno tuorno…
Pè San Giuvanne,
Puortece,
Resina,
Torre ‘o Grieco,
Pumpei,
Castellammare…
‘A rimpetto
risponne
Vico Equense,
Sant’Agnello,
Surriento…
Aret’ a na muntagna
nu bagliore:
spara Massa Lubrense.
Marciano pure spara…
e appriesso appriesso
sant’Agata
crapolla
Pusitano…
Spara Furore

O mare fa paura
Accussì dice ‘a ggente
guardanno ‘o mare calmo,
calmo cumme na tavula.
E dice ‘o stesso pure
dint’ ‘e gghiurnate ‘e vierno
quanno ‘o mare
s’aiza,
e l’onne saglieno
primm’ a palazz’ ‘e casa
e pò a muntagne.
Vergine santa…
scanza ‘e figlie ‘e mamma!
Certo,
pè chi se trova
cu nu mare ntempesta
e perde ‘a vita,
fa pena.
e ssongo ‘o primmo
a penza’ ncapo a me:
Che brutta morte ha fatto
stu pover’ommo,
e che mumento triste c’ha.
Ma nun e’ muorto acciso.
È muorto a mmare.
‘O mare nuna cide.
‘O mare è mmare,
e nun ‘o sape ca te fa paura.
Io quanno ‘o sento…
specialmente ‘e notte
quanno vatte ‘a scugliera
e caccia ‘e mmane…
migliara ‘e mane
e braccia
e ggamme
e spalle…
arraggiuso cumm’e’
nun se ne mporta
ca c’ ‘e straccia ‘a scugliera
e vveco ca s’ ‘e ttira
e se schiaffea
e caparbio,
mperruso,
cucciuto,
‘e caccia n’ata vota
e s’aiuta c’ ‘a capa
‘e spalle
‘e bracce
ch’ ‘e piede
e cu ‘e ddenoccie
e ride
e chiagne
pecché vulesse ‘o spazio pe’ sfuca’…
Io quanno ‘o sento,
specialmente ‘e notte,
cumme stevo dicenno,
nun e’ ca dico:
‘O mare fa paura,
ma dico:
‘O mare sta facenno ‘o mare.